ياحمامٍ سجع من فوق عالي السور=خف من الله عيوني لا تشقّيها
دوك دمعي على خدّي يسيل حدور=عبرتي في حشايه زاد صاليها
المباني خرايب والخرز منثور=طايحه ماتشوف إلا سواريها
وين حوطة حمد ورحبة ابن منصور=والمدينه قديمه وين أهاليها
وين حايط علا ودويغر المذكور=وين هاك العقاد ووين بانيها
وين ملوي ووين دويخل المعمور=والطويله وخبزه وين سانيها
والحميديّه وصنعٍ لها وقصور=مابقى ياجماعه كود أثاريها
وين حي الحسيني بالوفا ممهور=وابن حنطي ومدرسته وقاريها
والمساجد تضيق وهاالخبر مشهور=قاله الشاعر ابن حصيص مغليها
القهاوي تسوّى قبل شق النور=والرحى تدّرج مابذ خافيها
والنجر جض من زود الصخا والجور=والسواني تردد في مناحيها
والغروب الكبيره تنزح الميسور=والمحاحيل غنّت عذب أغانيها
والغنم صبح تسرح وتهضل للدور=وين عطر المنايح وين شاويها
والمجابيب خليت من صياح بزور=والمساقي قراوتها وساقيها
والنخيل المظلّه والثمر موفور=وين حدب الجريد ووين راقيها
والحويطه عليها ياردن الخور=وين عرب الركاب ووين حاديها
والقوافل تحدّر للحسا وتزور=ثلمة الحدوه أكبت وين ماشيها
واسفل السوق وينه والزمان يدور=وكل دارٍ خرابه وين راعيها
دفّنوا فالمقابر في قعير قبور=كل عينٍ تواجه عين داعيها
لو يطول الزمن لازم يجينا الدور=دبرة الله على المخلوق مجريها
الله أكبر على وقتٍ درج وسرور=ديرة العز مشهوره قهاويها
الرجال الثقيله والبنات الحور=الستر والشرف والحيا كاسيها
كل وقتٍ بجي له دوله وجمهور=سنّةٍ باول الدنيا وتاليها
لا تغرّك ولو غنّت لك المجرور=قلّبيّه على من هو يصافيها
لا ذكرت الزمان اللي مضى وعصور=قمت أجاوب حمام الورق أناجيها
دالهتٍ يغنن فوق عالي السور=سجعة الورق عاده ما يخلّيها
واختم القاف واصلّي على المبرور=راعي الحوض والاصنام مفنيها